Proverbs 8 in Hebrew – The Ancient Bible

Ancient Bible › Old Testament › Proverbs › 8

Proverbs 8 in the Hebrew of the Westminster Leningrad Codex. Proverbs is part of the poetic and wisdom literature.

Hebrew · Poetry & Wisdom

Proverbs 8

Westminster Leningrad Codex · every word parsed

1
הֲלֹֽא־חָכְמָ֥ה תִקְרָ֑א וּ֝תְבוּנָ֗ה תִּתֵּ֥ן קוֹלָֽהּ׃ 
2
בְּרֹאשׁ־מְרוֹמִ֥ים עֲלֵי־דָ֑רֶךְ בֵּ֖ית נְתִיב֣וֹת נִצָּֽבָה׃ 
3
לְיַד־שְׁעָרִ֥ים לְפִי־קָ֑רֶת מְב֖וֹא פְתָחִ֣ים תָּרֹֽנָּה׃ 
4
אֲלֵיכֶ֣ם אִישִׁ֣ים אֶקְרָ֑א וְ֝קוֹלִ֗י אֶל־בְּנֵ֥י אָדָֽם׃ 
5
הָבִ֣ינוּ פְתָאיִ֣ם עָרְמָ֑ה וּ֝כְסִילִ֗ים הָבִ֥ינוּ לֵֽב׃ 
6
שִׁ֭מְעוּ כִּֽי־נְגִידִ֣ים אֲדַבֵּ֑ר וּמִפְתַּ֥ח שְׂ֝פָתַ֗י מֵישָׁרִֽים׃ 
7
כִּֽי־אֱ֭מֶת יֶהְגֶּ֣ה חִכִּ֑י וְתוֹעֲבַ֖ת שְׂפָתַ֣י רֶֽשַׁע׃ 
8
בְּצֶ֥דֶק כָּל־אִמְרֵי־פִ֑י אֵ֥ין בָּ֝הֶ֗ם נִפְתָּ֥ל וְעִקֵּֽשׁ׃ 
9
כֻּלָּ֣ם נְ֭כֹחִים לַמֵּבִ֑ין וִֽ֝ישָׁרִ֗ים לְמֹ֣צְאֵי דָֽעַת׃ 
10
קְחֽוּ־מוּסָרִ֥י וְאַל־כָּ֑סֶף וְ֝דַ֗עַת מֵחָר֥וּץ נִבְחָֽר׃ 
11
כִּֽי־טוֹבָ֣ה חָ֭כְמָה מִפְּנִינִ֑ים וְכָל־חֲ֝פָצִ֗ים לֹ֣א יִֽשְׁווּ־בָֽהּ׃ 
12
אֲֽנִי־חָ֭כְמָה שָׁכַ֣נְתִּי עָרְמָ֑ה וְדַ֖עַת מְזִמּ֣וֹת אֶמְצָֽא׃ 
13
יִֽרְאַ֣ת יְהוָה֮ שְֽׂנֹ֫את רָ֥ע גֵּ֘אָ֤ה וְגָא֨וֹן ׀ וְדֶ֣רֶךְ רָ֭ע וּפִ֨י תַהְפֻּכ֬וֹת שָׂנֵֽאתִי׃ 
14
לִֽי־עֵ֭צָה וְתוּשִׁיָּ֑ה אֲנִ֥י בִ֝ינָ֗ה לִ֣י גְבוּרָֽה׃ 
15
בִּ֭י מְלָכִ֣ים יִמְלֹ֑כוּ וְ֝רוֹזְנִ֗ים יְחֹ֣קְקוּ צֶֽדֶק׃ 
16
בִּ֭י שָׂרִ֣ים יָשֹׂ֑רוּ וּ֝נְדִיבִ֗ים כָּל־שֹׁ֥פְטֵי צֶֽדֶק׃ 
17
אֲ֭נִי אֹהֲבַ֣י אֵהָ֑ב וּ֝מְשַׁחֲרַ֗י יִמְצָאֻֽנְנִי׃ 
18
עֹֽשֶׁר־וְכָב֥וֹד אִתִּ֑י ה֥וֹן עָ֝תֵ֗ק וּצְדָקָֽה׃ 
19
ט֣וֹב פִּ֭רְיִי מֵחָר֣וּץ וּמִפָּ֑ז וּ֝תְבוּאָתִ֗י מִכֶּ֥סֶף נִבְחָֽר׃ 
20
בְּאֹֽרַח־צְדָקָ֥ה אֲהַלֵּ֑ך בְּ֝ת֗וֹךְ נְתִיב֥וֹת מִשְׁפָּֽט׃ 
21
לְהַנְחִ֖יל אֹהֲבַ֥י ׀ יֵ֑שׁ וְאֹצְרֹ֖תֵיהֶ֣ם אֲמַלֵּֽא׃ 
22
יְֽהוָ֗ה קָ֭נָנִי רֵאשִׁ֣ית דַּרְכּ֑וֹ קֶ֖דֶם מִפְעָלָ֣יו מֵאָֽז׃ 
23
מֵ֭עוֹלָם נִסַּ֥כְתִּי מֵרֹ֗אשׁ מִקַּדְמֵי־אָֽרֶץ׃ 
24
בְּאֵין־תְּהֹמ֥וֹת חוֹלָ֑לְתִּי בְּאֵ֥ין מַ֝עְיָנ֗וֹת נִכְבַּדֵּי־מָֽיִם׃ 
25
בְּטֶ֣רֶם הָרִ֣ים הָטְבָּ֑עוּ לִפְנֵ֖י גְבָע֣וֹת חוֹלָֽלְתִּי׃ 
26
עַד־לֹ֣א עָ֭שָׂה אֶ֣רֶץ וְחוּצ֑וֹת וְ֝רֹ֗אשׁ עָפְר֥וֹת תֵּבֵֽל׃ 
27
בַּהֲכִינ֣וֹ שָׁ֭מַיִם שָׁ֣ם אָ֑נִי בְּח֥וּקוֹ ח֝֗וּג עַל־פְּנֵ֥י תְהֽוֹם׃ 
28
בְּאַמְּצ֣וֹ שְׁחָקִ֣ים מִמָּ֑עַל בַּ֝עֲז֗וֹז עִינ֥וֹת תְּהוֹם׃ 
29
בְּשׂ֘וּמ֤וֹ לַיָּ֨ם ׀ חֻקּ֗וֹ וּ֭מַיִם לֹ֣א יַֽעַבְרוּ־פִ֑יו בְּ֝חוּק֗וֹ מ֣וֹסְדֵי אָֽרֶץ׃ 
30
וָֽאֶהְיֶ֥ה אֶצְל֗וֹ אָ֫מ֥וֹן וָֽאֶהְיֶ֣ה שַׁ֭עֲשֻׁעִים י֤וֹם ׀ י֑וֹם מְשַׂחֶ֖קֶת לְפָנָ֣יו בְּכָל־עֵֽת׃ 
31
מְ֭שַׂחֶקֶת בְּתֵבֵ֣ל אַרְצ֑וֹ וְ֝שַׁעֲשֻׁעַ֗י אֶת־בְּנֵ֥י אָדָֽם׃ 
32
וְעַתָּ֣ה בָ֭נִים שִׁמְעוּ־לִ֑י וְ֝אַשְׁרֵ֗י דְּרָכַ֥י יִשְׁמֹֽרוּ׃ 
33
שִׁמְע֖וּ מוּסָ֥ר וַחֲכָ֗מוּ וְאַל־תִּפְרָֽעוּ׃ 
34
אַ֥שְֽׁרֵי אָדָם֮ שֹׁמֵ֪עַֽ֫ לִ֥י לִשְׁקֹ֣ד עַל־דַּ֭לְתֹתַי י֤וֹם ׀ י֑וֹם לִ֝שְׁמֹ֗ר מְזוּזֹ֥ת פְּתָחָֽי׃ 
35
כִּ֣י מֹ֭צְאִי מָצָ֣א חַיִּ֑ים וַיָּ֥פֶק רָ֝צ֗וֹן מֵיְהוָֽה׃ 
36
וְֽ֭חֹטְאִי חֹמֵ֣ס נַפְשׁ֑וֹ כָּל־מְ֝שַׂנְאַ֗י אָ֣הֲבוּ מָֽוֶת׃ 

Click or tap any word for its parse and dictionary entry. ← and → move between chapters.

Text: Westminster Leningrad Codex (public domain). Lemmas and morphology: Open Scriptures Hebrew Bible (CC BY 4.0). Dictionary: Brown-Driver-Briggs. Grammatical descriptions: STEP Bible, Tyndale House Cambridge (CC BY 4.0).

The words of this chapter

161 distinct words — each links to every other place it occurs.

כֹּלthe whole6 מָצָאattain to5 לֹאnot4 דֶּ֫רֶךְway4 פֶּהmouth4 שָׁמַעhear4 כִּיthat4 אֲנִיI4 אָהֵבlove4 אֶ֫רֶץearth4 יוֹםday4 חׇכְמָהwisdom3 רֹאשׁhead3 עַלabove3 בֵּןson3 אָדָםman3 בִּיןdiscern3 צֶ֫דֶקrightness3 אַ֫יִןnothing3 דַּ֫עַתknowledge3 יהוהJehovah3 שָׂנֵאhate3 חָקַקcut in3 תְּהוֹםdeep3 פָּנֶהface3 קָרָאcall2 קוֹלsound2 נְתִיבָהpath2 פֶּ֫תַחopening2 אֶלmotion to2 עׇרְמָהcraftiness2 שָׂפָהlip2 מוּסָרdiscipline2 אַלnot2 כֶּ֫סֶףsilver2 חָרוּץgold2 בָּחַרchoose2 טוֹבpleasant2 רַעevil2 אֵתwith2 צְדָקָהrighteousness2 קֶ֫דֶםfront2 חוּלwhirl2 מַיwaters2 תֵּבֵלworld2 הָיָהfall out2 שַׁעֲשֻׁעִיםdelight2 שָׂחַקlaugh2 אֶ֫שֶׁרhappiness2 שָׁמַרkeep2 תְּבוּנָהunderstanding נָתַןgive מָרוֹםheight בֵּיתbetween נָצַבtake one’s stand יָדhand שַׁ֫עַרgate קֶ֫רֶתtown מָבוֹאentrance רָנַןgive a ringing cry אִישׁman פֶּ֫תִיsimple כְּסִילstupid fellow לֵבinner man נָגִידleader דָבַרspeak מִפְתָּחopening מֵישָׁרevenness אֱמֶתfirmness הָגָהmoan חֵךְpalate תּוֹעֵבַהabomination רֶ֫שַׁעwickedness אֵמֶרutterance פָּתַלtwist עִקֵּשׁtwisted נָכֹחַstraight יָשָׁרstraight לָקַחtake פְּנִינִיםcorals חֵ֫פֶץdelight שָׁוָהbe even שָׁכַןsettle down מְזִמָּהpurpose יִרְאָהfear גֵּאָהpride גָּאוֹןexaltation תַּהְפֻּכָהperversity עֵצָהcounsel תּוּשִׁיָּהsound בִּינָהunderstanding גְּבוּרָהstrength מֶ֫לֶךְking מָלַךְbe king רָזַןbe weighty שַׂרchieftain שָׂרַרbe prince נָדִיבinclined שָׁפַטjudge שָׁחַרlook early עֹ֫שֶׁרriches כָּבוֹדabundance הוֹןwealth עָתֵקvaluable פְּרִיfruit פַּזrefined תְּבוּאָהproduct אֹ֫רַחway הָלַךְgo תָּ֫וֶךְmidst מִשְׁפָּטjudgment נָחַלget as a possession יֵשׁbeing אוֹצָרtreasure מָלֵאbe full קָנָהget רֵאשִׁיתbeginning מִפְעָלwork מֵאָזfrom that time עוֹלָםlong duration נָסַךְset מַעְיָןspring כָּבֵדbe heavy טֶ֫רֶםnot yet הַרmountain טָבַעsink גִּבְעָהhill עַדas far as עָשָׂהdo חוּץthe outside עָפָרdry earth כּוּןbe firm שָׁמַיִםheavens שָׁםthere חוּגvault אָמֵץbe stout שַׁ֫חַקdust מַ֫עַלhigher part עָזַזbe strong עַ֫יִןspring שׂוּםput יָםsea חֹקsomething prescribed עָבַרpass over מוֹסָדfoundation אֵ֫צֶלconjunction אָמוֹןartificer עֵתtime עַתָּ֫הnow חָכַםbe wise פָּרַעlet go שָׁקַדwatch דֶּ֫לֶתdoor מְזוּזָהdoor-post חַיִּיםlife פּוּקbring out רָצוֹןgoodwill חָטָאmiss חָמַסtreat violently נֶ֫פֶשׁsoul מָ֫וֶתdeath