Proverbs 4 in the Hebrew of the Westminster Leningrad Codex. Proverbs is part of the poetic and wisdom literature.
1
שִׁמְע֣וּ בָ֭נִים מ֣וּסַר אָ֑ב וְ֝הַקְשִׁ֗יבוּ לָדַ֥עַת בִּינָֽה׃
2
כִּ֤י לֶ֣קַח ט֭וֹב נָתַ֣תִּי לָכֶ֑ם תּֽ֝וֹרָתִ֗י אַֽל־תַּעֲזֹֽבוּ׃
3
כִּי־בֵ֭ן הָיִ֣יתִי לְאָבִ֑י רַ֥ךְ וְ֝יָחִ֗יד לִפְנֵ֥י אִמִּֽי׃
4
וַיֹּרֵ֗נִי וַיֹּ֥אמֶר לִ֗י יִֽתְמָךְ־דְּבָרַ֥י לִבֶּ֑ךָ שְׁמֹ֖ר מִצְוֺתַ֣י וֶֽחְיֵֽה׃
5
קְנֵ֣ה חָ֭כְמָה קְנֵ֣ה בִינָ֑ה אַל־תִּשְׁכַּ֥ח וְאַל־תֵּ֝֗ט מֵֽאִמְרֵי־פִֽי׃
6
אַל־תַּעַזְבֶ֥הָ וְתִשְׁמְרֶ֑ךָּ אֱהָבֶ֥הָ וְתִצְּרֶֽךָּ׃
7
רֵאשִׁ֣ית חָ֭כְמָה קְנֵ֣ה חָכְמָ֑ה וּבְכָל־קִ֝נְיָנְךָ֗ קְנֵ֣ה בִינָֽה׃
8
סַלְסְלֶ֥הָ וּֽתְרוֹמְמֶ֑ךָּ תְּ֝כַבֵּ֗דְךָ כִּ֣י תְחַבְּקֶֽנָּה׃
9
תִּתֵּ֣ן לְ֭רֹאשְׁךָ לִוְיַת־חֵ֑ן עֲטֶ֖רֶת תִּפְאֶ֣רֶת תְּמַגְּנֶֽךָּ׃
10
שְׁמַ֣ע בְּ֭נִי וְקַ֣ח אֲמָרָ֑י וְיִרְבּ֥וּ לְ֝ךָ֗ שְׁנ֣וֹת חַיִּֽים׃
11
בְּדֶ֣רֶךְ חָ֭כְמָה הֹרֵתִ֑יךָ הִ֝דְרַכְתִּ֗יךָ בְּמַעְגְּלֵי־יֹֽשֶׁר׃
12
בְּֽ֭לֶכְתְּךָ לֹא־יֵצַ֣ר צַעֲדֶ֑ךָ וְאִם־תָּ֝ר֗וּץ לֹ֣א תִכָּשֵֽׁל׃
13
הַחֲזֵ֣ק בַּמּוּסָ֣ר אַל־תֶּ֑רֶף נִ֝צְּרֶ֗הָ כִּי־הִ֥יא חַיֶּֽיךָ׃
14
בְּאֹ֣רַח רְ֭שָׁעִים אַל־תָּבֹ֑א וְאַל־תְּ֝אַשֵּׁ֗ר בְּדֶ֣רֶךְ רָעִֽים׃
15
פְּרָעֵ֥הוּ אַל־תַּעֲבָר־בּ֑וֹ שְׂטֵ֖ה מֵעָלָ֣יו וַעֲבֽוֹר׃
16
כִּ֤י לֹ֣א יִֽ֭שְׁנוּ אִם־לֹ֣א יָרֵ֑עוּ וְֽנִגְזְלָ֥ה שְׁ֝נָתָ֗ם אִם־לֹ֥א יַכְשִֽׁילוּ׃
17
כִּ֣י לָ֭חֲמוּ לֶ֣חֶם רֶ֑שַׁע וְיֵ֖ין חֲמָסִ֣ים יִשְׁתּֽוּ׃
18
וְאֹ֣רַח צַ֭דִּיקִים כְּא֣וֹר נֹ֑גַהּ הוֹלֵ֥ךְ וָ֝א֗וֹר עַד־נְכ֥וֹן הַיּֽוֹם׃
19
דֶּ֣רֶךְ רְ֭שָׁעִים כָּֽאֲפֵלָ֑ה לֹ֥א יָ֝דְע֗וּ בַּמֶּ֥ה יִכָּשֵֽׁלוּ׃
20
בְּ֭נִי לִדְבָרַ֣י הַקְשִׁ֑יבָה לַ֝אֲמָרַ֗י הַט־אָזְנֶֽךָ׃
21
אַל־יַלִּ֥יזוּ מֵעֵינֶ֑יךָ שָׁ֝מְרֵ֗ם בְּת֣וֹךְ לְבָבֶֽךָ׃
22
כִּֽי־חַיִּ֣ים הֵ֭ם לְמֹצְאֵיהֶ֑ם וּֽלְכָל־בְּשָׂר֥וֹ מַרְפֵּֽא׃
23
מִֽכָּל־מִ֭שְׁמָר נְצֹ֣ר לִבֶּ֑ךָ כִּֽי־מִ֝מֶּ֗נּוּ תּוֹצְא֥וֹת חַיִּֽים׃
24
הָסֵ֣ר מִ֭מְּךָ עִקְּשׁ֣וּת פֶּ֑ה וּלְז֥וּת שְׂ֝פָתַ֗יִם הַרְחֵ֥ק מִמֶּֽךָּ׃
25
עֵ֭ינֶיךָ לְנֹ֣כַח יַבִּ֑יטוּ וְ֝עַפְעַפֶּ֗יךָ יַיְשִׁ֥רוּ נֶגְדֶּֽךָ׃
26
פַּ֭לֵּס מַעְגַּ֣ל רַגְלֶ֑ךָ וְֽכָל־דְּרָכֶ֥יךָ יִכֹּֽנוּ׃
27
אַֽל־תֵּט־יָמִ֥ין וּשְׂמֹ֑אול הָסֵ֖ר רַגְלְךָ֣ מֵרָֽע׃
Click or tap any word for its parse and dictionary entry. ← and → move between chapters.
Text: Westminster Leningrad Codex (public domain). Lemmas and morphology: Open Scriptures Hebrew Bible (CC BY 4.0). Dictionary: Brown-Driver-Briggs. Grammatical descriptions: STEP Bible, Tyndale House Cambridge (CC BY 4.0).
The words of this chapter
121 distinct words — each links to every other place it occurs.
אַלnot10כִּיthat8לֹאnot6בֵּןson4קָנָהget4חׇכְמָהwisdom4כֹּלthe whole4חַיִּיםlife4דֶּ֫רֶךְway4בִּינָהunderstanding3שָׁמַרkeep3נָטָהstretch out3אֵמֶרutterance3נָצַרwatch3אִםif3כָּשַׁלstumble3מִן־out of3שָׁמַעhear2מוּסָרdiscipline2אָבfather2קָשַׁבincline2יָדַעknow2נָתַןgive2עָזַבleave2יָרָהthrow2דָּבָרspeech2לֵבinner man2פֶּהmouth2מַעְגָּלentrenchment2אֹ֫רַחway2רָשָׁעwicked2רַעbad2עָבַרpass over2כּוּןbe firm2עַ֫יִןeye2סוּרturn aside2רֶ֫גֶלfoot2לֶ֫קַחlearningטוֹבpleasantתּוֹרָהdirectionהָיָהfall outרַךְtenderיָחִידonlyפָּנֶהfaceאֵםmotherאָמַרutterתָּמַךְgraspמִצְוָהcommandmentחָיָהliveשָׁכַחforgetאָהֵבloveרֵאשִׁיתbeginningקִנְיָןthing gotסָלַלlift upרוּםbe highכָּבֵדbe heavyחָבַקclaspרֹאשׁheadלִוְיָהwreathחֵןfavourעֲטָרָהcrownתִּפְאָרָהbeautyמָגַןdeliver upלָקַחtakeרָבָהbe muchשָׁנָהyearדָּרַךְtreadיֹ֫שֶׁרstraightnessיָלַךְgoיָצַרbindצַ֫עַדstepרוּץrunחָזַקbe firmרָפָהsinkהוּאheבּוֹאcome inאָשַׁרgo straightפָּרַעlet goשָׂטָהturn asideעַלaboveיָשֵׁןsleepרָעַעbe evilגָּזַלtear awayשֵׁנָהsleepלָחַםuse as foodלֶ֫חֶםbreadרֶ֫שַׁעwickednessיַ֫יִןwineחָמָסviolenceשָׁתָהdrinkצַדִּיקjustאוֹרlightנֹ֫גַהּbrightnessהָלַךְgoאוֹרbe lightעַדas far asיוֹםdayאֲפֵלָהdarknessמָהwhat?אֹ֫זֶןearלוּזturn asideתָּ֫וֶךְmidstלֵבָבinner manהֵ֫מָּהtheyמָצָאattain toבָּשָׂרfleshמַרְפֵּאhealingמִשְׁמָרplace of confinementתּוֹצָאָהoutgoingעִקְּשׁוּתcrookednessלָזוּתdeviationשָׂפָהlipרָחַקbe farנֹ֫כַחfrontנָבַטlookעַפְעַףeyelidיָשַׁרbe smoothנֶ֫גֶדwhat is conspicuousפָּלַסweighיָמִיןright handשְׂמֹאלthe left