Exodus 1 in the Hebrew of the Westminster Leningrad Codex. Exodus is one of the five books of the Torah.
1
וְאֵ֗לֶּה שְׁמוֹת֙ בְּנֵ֣י יִשְׂרָאֵ֔ל הַבָּאִ֖ים מִצְרָ֑יְמָה אֵ֣ת יַעֲקֹ֔ב אִ֥ישׁ וּבֵית֖וֹ בָּֽאוּ׃
2
רְאוּבֵ֣ן שִׁמְע֔וֹן לֵוִ֖י וִיהוּדָֽה׃
3
יִשָּׂשכָ֥ר זְבוּלֻ֖ן וּבְנְיָמִֽן׃
4
דָּ֥ן וְנַפְתָּלִ֖י גָּ֥ד וְאָשֵֽׁר׃
5
וַֽיְהִ֗י כָּל־נֶ֛פֶשׁ יֹצְאֵ֥י יֶֽרֶךְ־יַעֲקֹ֖ב שִׁבְעִ֣ים נָ֑פֶשׁ וְיוֹסֵ֖ף הָיָ֥ה בְמִצְרָֽיִם׃
6
וַיָּ֤מָת יוֹסֵף֙ וְכָל־אֶחָ֔יו וְכֹ֖ל הַדּ֥וֹר הַהֽוּא׃
7
וּבְנֵ֣י יִשְׂרָאֵ֗ל פָּר֧וּ וַֽיִּשְׁרְצ֛וּ וַיִּרְבּ֥וּ וַיַּֽעַצְמ֖וּ בִּמְאֹ֣ד מְאֹ֑ד וַתִּמָּלֵ֥א הָאָ֖רֶץ אֹתָֽם׃
8
וַיָּ֥קָם מֶֽלֶךְ־חָדָ֖שׁ עַל־מִצְרָ֑יִם אֲשֶׁ֥ר לֹֽא־יָדַ֖ע אֶת־יוֹסֵֽף׃
9
וַיֹּ֖אמֶר אֶל־עַמּ֑וֹ הִנֵּ֗ה עַ֚ם בְּנֵ֣י יִשְׂרָאֵ֔ל רַ֥ב וְעָצ֖וּם מִמֶּֽנּוּ׃
10
הָ֥בָה נִֽתְחַכְּמָ֖ה ל֑וֹ פֶּן־יִרְבֶּ֗ה וְהָיָ֞ה כִּֽי־תִקְרֶ֤אנָה מִלְחָמָה֙ וְנוֹסַ֤ף גַּם־הוּא֙ עַל־שֹׂ֣נְאֵ֔ינוּ וְנִלְחַם־בָּ֖נוּ וְעָלָ֥ה מִן־הָאָֽרֶץ׃
11
וַיָּשִׂ֤ימוּ עָלָיו֙ שָׂרֵ֣י מִסִּ֔ים לְמַ֥עַן עַנֹּת֖וֹ בְּסִבְלֹתָ֑ם וַיִּ֜בֶן עָרֵ֤י מִסְכְּנוֹת֙ לְפַרְעֹ֔ה אֶת־פִּתֹ֖ם וְאֶת־רַעַמְסֵֽס׃
12
וְכַאֲשֶׁר֙ יְעַנּ֣וּ אֹת֔וֹ כֵּ֥ן יִרְבֶּ֖ה וְכֵ֣ן יִפְרֹ֑ץ וַיָּקֻ֕צוּ מִפְּנֵ֖י בְּנֵ֥י יִשְׂרָאֵֽל׃
13
וַיַּעֲבִ֧דוּ מִצְרַ֛יִם אֶת־בְּנֵ֥י יִשְׂרָאֵ֖ל בְּפָֽרֶךְ׃
14
וַיְמָרְר֨וּ אֶת־חַיֵּיהֶ֜ם בַּעֲבֹדָ֣ה קָשָׁ֗ה בְּחֹ֨מֶר֙ וּבִלְבֵנִ֔ים וּבְכָל־עֲבֹדָ֖ה בַּשָּׂדֶ֑ה אֵ֚ת כָּל־עֲבֹ֣דָתָ֔ם אֲשֶׁר־עָבְד֥וּ בָהֶ֖ם בְּפָֽרֶךְ׃
15
וַיֹּ֨אמֶר֙ מֶ֣לֶךְ מִצְרַ֔יִם לַֽמְיַלְּדֹ֖ת הָֽעִבְרִיֹּ֑ת אֲשֶׁ֨ר שֵׁ֤ם הָֽאַחַת֙ שִׁפְרָ֔ה וְשֵׁ֥ם הַשֵּׁנִ֖ית פּוּעָֽה׃
16
וַיֹּ֗אמֶר בְּיַלֶּדְכֶן֙ אֶת־הָֽעִבְרִיּ֔וֹת וּרְאִיתֶ֖ן עַל־הָאָבְנָ֑יִם אִם־בֵּ֥ן הוּא֙ וַהֲמִתֶּ֣ן אֹת֔וֹ וְאִם־בַּ֥ת הִ֖יא וָחָֽיָה׃
17
וַתִּירֶ֤אןָ הַֽמְיַלְּדֹת֙ אֶת־הָ֣אֱלֹהִ֔ים וְלֹ֣א עָשׂ֔וּ כַּאֲשֶׁ֛ר דִּבֶּ֥ר אֲלֵיהֶ֖ן מֶ֣לֶךְ מִצְרָ֑יִם וַתְּחַיֶּ֖יןָ אֶת־הַיְלָדִֽים׃
18
וַיִּקְרָ֤א מֶֽלֶךְ־מִצְרַ֨יִם֙ לַֽמְיַלְּדֹ֔ת וַיֹּ֣אמֶר לָהֶ֔ן מַדּ֥וּעַ עֲשִׂיתֶ֖ן הַדָּבָ֣ר הַזֶּ֑ה וַתְּחַיֶּ֖יןָ אֶת־הַיְלָדִֽים׃
19
וַתֹּאמַ֤רְןָ הַֽמְיַלְּדֹת֙ אֶל־פַּרְעֹ֔ה כִּ֣י לֹ֧א כַנָּשִׁ֛ים הַמִּצְרִיֹּ֖ת הָֽעִבְרִיֹּ֑ת כִּֽי־חָי֣וֹת הֵ֔נָּה בְּטֶ֨רֶם תָּב֧וֹא אֲלֵהֶ֛ן הַמְיַלֶּ֖דֶת וְיָלָֽדוּ׃
20
וַיֵּ֥יטֶב אֱלֹהִ֖ים לַֽמְיַלְּדֹ֑ת וַיִּ֧רֶב הָעָ֛ם וַיַּֽעַצְמ֖וּ מְאֹֽד׃
21
וַיְהִ֕י כִּֽי־יָֽרְא֥וּ הַֽמְיַלְּדֹ֖ת אֶת־הָאֱלֹהִ֑ים וַיַּ֥עַשׂ לָהֶ֖ם בָּתִּֽים׃
22
וַיְצַ֣ו פַּרְעֹ֔ה לְכָל־עַמּ֖וֹ לֵאמֹ֑ר כָּל־הַבֵּ֣ן הַיִּלּ֗וֹד הַיְאֹ֨רָה֙ תַּשְׁלִיכֻ֔הוּ וְכָל־הַבַּ֖ת תְּחַיּֽוּן׃
Click or tap any word for its parse and dictionary entry. ← and → move between chapters.
Text: Westminster Leningrad Codex (public domain). Lemmas and morphology: Open Scriptures Hebrew Bible (CC BY 4.0). Dictionary: Brown-Driver-Briggs. Grammatical descriptions: STEP Bible, Tyndale House Cambridge (CC BY 4.0).
The words of this chapter
122 distinct words — each links to every other place it occurs.
אֵתmark of the accusative14יָלַדbear9כֹּלthe whole8בֵּןson7מִצְרַ֫יִםEgypt6אָמַרutter6יִשְׂרָאֵלIsrael5הָיָהfall out4הוּאhe4רָבָהbe much4מֶ֫לֶךְking4עַלabove4אֶלmotion to4עַםpeople4כִּיthat4שֵׁםname3בּוֹאcome in3יוֹסֵףJoseph3מְאֹדmuchness3אֲשֶׁרwho3לֹאnot3פַּרְעֹהPharaoh3עֲבֹדָהlabour3עִבְרִיHebrew3אֱלֹהִיםgods3עָשָׂהdo3חָיָהlive3יַעֲקֹבJacob2בַּ֫יִתhouse2נֶ֫פֶשׁsoul2מוּתdie2עָצֹםbe vast2אֶ֫רֶץearth2מִן־out of2עָנָהbe bowed down2כַּאֲשֶׁרaccording as2כֵּןso2עָבַדwork2מִצְרִיEgyptian2פֶּ֫רֶךְharshness2אִםif2בַּתdaughter2יָרֵאfear2יֶ֫לֶדchild2אֵ֫לֶּהtheseאֵתwithאִישׁmanרְאוּבֵןReubenשִׁמְעוֹןSimeonלֵוִיLeviיְהוּדָהJudahיִשָּׂשכָרIssacharזְבוּלֻןZebulunבִּנְיָמִיןBenjaminדָּןDanielנַפְתָּלִיNaphtaliגָּדGadאָשֵׁרAsherיָצָאgo outיָרֵךְthighשִׁבְעִיםseventyאָחbrotherדּוֹרperiodפָּרָהbear fruitשָׁרַץswarmמָלֵאbe fullקוּםariseחָדָשׁnewיָדַעknowהִנֵּהlo!רַבmuchעָצוּםmightyיָהַבgiveחָכַםbe wiseפֶּן־lestקָרָאencounterמִלְחָמָהbattleיָסַףaddגַּםalsoשָׂנֵאhateלָחַםfightעָלָהgo upשׂוּםputשַׂרchieftainמַסbody of forced labourersמַ֫עַןpurposeסִבְלָהburdenבָּנָהbuildעִירcityמִסְכְּנוֹתsupplyפִּתֹםPithomרַֽעַמְסֵסRaamsesפָּרַץbreak throughקוּץfeel a loathingפָּנֶהfaceמָרַרbe bitterחַיִּיםlifeקָשֶׁהhardחֹ֫מֶרcementלְבֵנָהbrickשָׂדֶהfieldאֶחָדoneשִׁפְרָהShiphrahשֵׁנִיsecondפּוּעָהPuahרָאָהseeאֹבֶןwheelחָיַיliveדָבַרspeakקָרָאcallמַדּוּעַwherefore?דָּבָרspeechזֶהthisאִשָּׁהwomanחָיֶהhaving the vigour of lifeהֵנָּהthemselvesטֶ֫רֶםnot yetיָטַבbe goodצָוָהlay chargeיִלּוֹדbornיְאֹרstream of the Nileשָׁלַךְthrow