2 Chronicles 8 in the Hebrew of the Westminster Leningrad Codex. 2 Chronicles is part of the historical books.
1
וַיְהִ֞י מִקֵּ֣ץ ׀ עֶשְׂרִ֣ים שָׁנָ֗ה אֲשֶׁ֨ר בָּנָ֧ה שְׁלֹמֹ֛ה אֶת־בֵּ֥ית יְהוָ֖ה וְאֶת־בֵּיתֽוֹ׃
2
וְהֶעָרִ֗ים אֲשֶׁ֨ר נָתַ֤ן חוּרָם֙ לִשְׁלֹמֹ֔ה בָּנָ֥ה שְׁלֹמֹ֖ה אֹתָ֑ם וַיּ֥וֹשֶׁב שָׁ֖ם אֶת־בְּנֵ֥י יִשְׂרָאֵֽל׃
3
וַיֵּ֤לֶךְ שְׁלֹמֹה֙ חֲמָ֣ת צוֹבָ֔ה וַיֶּחֱזַ֖ק עָלֶֽיהָ׃
4
וַיִּ֥בֶן אֶת־תַּדְמֹ֖ר בַּמִּדְבָּ֑ר וְאֵת֙ כָּל־עָרֵ֣י הַֽמִּסְכְּנ֔וֹת אֲשֶׁ֥ר בָּנָ֖ה בַּחֲמָֽת׃
5
וַיִּ֜בֶן אֶת־בֵּ֤ית חוֹרוֹן֙ הָֽעֶלְי֔וֹן וְאֶת־בֵּ֥ית חוֹר֖וֹן הַתַּחְתּ֑וֹן עָרֵ֣י מָצ֔וֹר חוֹמ֖וֹת דְּלָתַ֥יִם וּבְרִֽיחַ׃
6
וְאֶֽת־בַּעֲלָ֗ת וְאֵ֨ת כָּל־עָרֵ֤י הַֽמִּסְכְּנוֹת֙ אֲשֶׁ֣ר הָי֣וּ לִשְׁלֹמֹ֔ה וְאֵת֙ כָּל־עָרֵ֣י הָרֶ֔כֶב וְאֵ֖ת עָרֵ֣י הַפָּרָשִׁ֑ים וְאֵ֣ת ׀ כָּל־חֵ֣שֶׁק שְׁלֹמֹ֗ה אֲשֶׁ֤ר חָשַׁק֙ לִבְנ֤וֹת בִּירֽוּשָׁלִַ֨ם֙ וּבַלְּבָנ֔וֹן וּבְכֹ֖ל אֶ֥רֶץ מֶמְשַׁלְתּֽוֹ׃
7
כָּל־הָ֠עָם הַנּוֹתָ֨ר מִן־הַחִתִּ֜י וְהָאֱמֹרִ֤י וְהַפְּרִזִּי֙ וְהַחִוִּ֣י וְהַיְבוּסִ֔י אֲשֶׁ֛ר לֹ֥א מִיִּשְׂרָאֵ֖ל הֵֽמָּה׃
8
מִן־בְּנֵיהֶ֗ם אֲשֶׁ֨ר נוֹתְר֤וּ אַחֲרֵיהֶם֙ בָּאָ֔רֶץ אֲשֶׁ֥ר לֹֽא־כִלּ֖וּם בְּנֵ֣י יִשְׂרָאֵ֑ל וַיַּעֲלֵ֤ם שְׁלֹמֹה֙ לְמַ֔ס עַ֖ד הַיּ֥וֹם הַזֶּֽה׃
9
וּמִן־בְּנֵי֙ יִשְׂרָאֵ֔ל אֲ֠שֶׁר לֹא־נָתַ֧ן שְׁלֹמֹ֛ה לַעֲבָדִ֖ים לִמְלַאכְתּ֑וֹ כִּי־הֵ֜מָּה אַנְשֵׁ֤י מִלְחָמָה֙ וְשָׂרֵ֣י שָׁלִישָׁ֔יו וְשָׂרֵ֥י רִכְבּ֖וֹ וּפָרָשָֽׁיו׃
10
וְאֵ֨לֶּה שָׂרֵ֤י הַנִּצָּבִ֛ים אֲשֶׁר־לַמֶּ֥לֶךְ שְׁלֹמֹ֖ה חֲמִשִּׁ֣ים וּמָאתָ֑יִם הָרֹדִ֖ים בָּעָֽם׃
11
וְאֶת־בַּת־פַּרְעֹ֗ה הֶעֱלָ֤ה שְׁלֹמֹה֙ מֵעִ֣יר דָּוִ֔יד לַבַּ֖יִת אֲשֶׁ֣ר בָּֽנָה־לָ֑הּ כִּ֣י אָמַ֗ר לֹא־תֵשֵׁ֨ב אִשָּׁ֥ה לִי֙ בְּבֵית֙ דָּוִ֣יד מֶֽלֶךְ־יִשְׂרָאֵ֔ל כִּי־קֹ֣דֶשׁ הֵ֔מָּה אֲשֶׁר־בָּֽאָ֥ה אֲלֵיהֶ֖ם אֲר֥וֹן יְהוָֽה׃
12
אָ֣ז הֶעֱלָ֧ה שְׁלֹמֹ֛ה עֹל֖וֹת לַיהוָ֑ה עַ֚ל מִזְבַּ֣ח יְהוָ֔ה אֲשֶׁ֥ר בָּנָ֖ה לִפְנֵ֥י הָאוּלָֽם׃
13
וּבִדְבַר־י֣וֹם בְּי֗וֹם לְהַעֲלוֹת֙ כְּמִצְוַ֣ת מֹשֶׁ֔ה לַשַּׁבָּתוֹת֙ וְלֶ֣חֳדָשִׁ֔ים וְלַמּ֣וֹעֲד֔וֹת שָׁל֥וֹשׁ פְּעָמִ֖ים בַּשָּׁנָ֑ה בְּחַ֧ג הַמַּצּ֛וֹת וּבְחַ֥ג הַשָּׁבֻע֖וֹת וּבְחַ֥ג הַסֻּכּֽוֹת׃
14
וַיַּעֲמֵ֣ד כְּמִשְׁפַּ֣ט דָּֽוִיד־אָ֠בִיו אֶת־מַחְלְק֨וֹת הַכֹּהֲנִ֜ים עַל־עֲבֹדָתָ֗ם וְהַלְוִיִּ֣ם עַל־מִ֠שְׁמְרוֹתָם לְהַלֵּ֨ל וּלְשָׁרֵ֜ת נֶ֤גֶד הַכֹּֽהֲנִים֙ לִדְבַר־י֣וֹם בְּיוֹמ֔וֹ וְהַשּׁוֹעֲרִ֥ים בְּמַחְלְקוֹתָ֖ם לְשַׁ֣עַר וָשָׁ֑עַר כִּ֣י כֵ֔ן מִצְוַ֖ת דָּוִ֥יד אִישׁ־הָאֱלֹהִֽים׃
15
וְלֹ֣א סָרוּ֩ מִצְוַ֨ת הַמֶּ֜לֶךְ עַל־הַכֹּהֲנִ֧ים וְהַלְוִיִּ֛ם לְכָל־דָּבָ֖ר וְלָאֹצָרֽוֹת׃
16
וַתִּכֹּן֙ כָּל־מְלֶ֣אכֶת שְׁלֹמֹ֔ה עַד־הַיּ֛וֹם מוּסַ֥ד בֵּית־יְהוָ֖ה וְעַד־כְּלֹת֑וֹ שָׁלֵ֖ם בֵּ֥ית יְהוָֽה׃
17
אָז֩ הָלַ֨ךְ שְׁלֹמֹ֜ה לְעֶצְיֽוֹן־גֶּ֧בֶר וְאֶל־אֵיל֛וֹת עַל־שְׂפַ֥ת הַיָּ֖ם בְּאֶ֥רֶץ אֱדֽוֹם׃
18
וַיִּֽשְׁלַֽח־לוֹ֩ חוּרָ֨ם בְּיַד־עֲבָדָ֜יו אֳנִיּ֗וֹת וַעֲבָדִים֮ י֣וֹדְעֵי יָם֒ וַיָּבֹ֜אוּ עִם־עַבְדֵ֤י שְׁלֹמֹה֙ אוֹפִ֔ירָה וַיִּקְח֣וּ מִשָּׁ֔ם אַרְבַּע־מֵא֥וֹת וַחֲמִשִּׁ֖ים כִּכַּ֣ר זָהָ֑ב וַיָּבִ֖יאוּ אֶל־הַמֶּ֥לֶךְ שְׁלֹמֹֽה׃
Click or tap any word for its parse and dictionary entry. ← and → move between chapters.
Text: Westminster Leningrad Codex (public domain). Lemmas and morphology: Open Scriptures Hebrew Bible (CC BY 4.0). Dictionary: Brown-Driver-Briggs. Grammatical descriptions: STEP Bible, Tyndale House Cambridge (CC BY 4.0).
The words of this chapter
134 distinct words — each links to every other place it occurs.
שְׁלֹמֹהSolomon15אֵתmark of the accusative15אֲשֶׁרwho13בָּנָהbuild8כֹּלthe whole8עִירcity7בַּ֫יִתhouse6יהוהJehovah6עַלabove6יוֹםday6יִשְׂרָאֵלIsrael5לֹאnot5בֵּןson4בֵּית חוֹרֹןBeth-horon4עָלָהgo up4עֶ֫בֶדslave4כִּיthat4מֶ֫לֶךְking4דָּוִדDavid4אֶ֫רֶץearth3מִן־out of3הֵ֫מָּהthey3עַדas far as3שַׂרchieftain3בּוֹאcome in3אֶלmotion to3דָּבָרspeech3מִצְוָהcommandment3חַגfestival-gathering3כֹּהֵןpriest3הָיָהfall out2שָׁנָהyear2נָתַןgive2חוּרָםHuram2יָשַׁבsit2שָׁםthere2חֲמַת צוֹבָהHamath-Zobah2מִסְכְּנוֹתsupply2רֶ֫כֶבchariotry2פָּרָשׁhorseman2עַםpeople2יָתַרremain over2כָּלָהbe complete2מְלָאכָהoccupation2אִישׁman2חֲמִשִּׁיםfifty2מֵאָהhundred2אָזat that time2מַחֲלֹ֫קֶתdivision2לֵוִיLevite2שַׁ֫עַרgate2עֶצְיוֹן גֶּ֫בֶרEzion-geber2יָםsea2קֵץendעֶשְׂרִיםtwentyיָלַךְgoחָזַקbe firmתַּדְמֹרTadmorמִדְבָּרwildernessחֲמָתHamathעֶלְיוֹןhighתַּחְתּוֹןlowerמָצוֹרsiege-enclosureחוֹמָהwallדֶּ֫לֶתdoorבְּרִיחַbarבַּעֲלָתBaalathחֵ֫שֶׁקdesireחָשַׁקbe attached toיְרוּשָׁלִַ֫͏םJerusalemלְבָנוֹןLebanonמִמְשָׁלdominionחִתִּיHittiteאֱמֹרִיAmoriteפְּרִזִּיPerizziteחִוִּיHiviteיְבוּסִיJebusiteאַחַרthe hinderמַסbody of forced labourersזֶהthisמִלְחָמָהbattleשָׁלִישׁadjutantאֵ֫לֶּהtheseנָצַבtake one’s standרָדָהhave dominionבַּתdaughterפַּרְעֹהPharaohאָמַרutterאִשָּׁהwomanקֹ֫דֶשׁapartnessאֲרוֹןchestעֹלָהwhole burnt-offeringמִזְבֵּחַaltarפָּנֶהfaceאוּלָםporchמֹשֶׁהMosesשַׁבָּתSabbathחֹ֫דֶשׁnewnessמוֹעֵדappointed timeשָׁלֹשׁa threeפַּ֫עַםbeatמַצָּהunleavened breadשָׁבוּעַperiod of sevenסֻכָּהthicketעָמַדtake one’s standמִשְׁפָּטjudgmentאָבfatherעֲבֹדָהlabourמִשְׁמֶ֫רֶתguardהָלַלbe boastfulשָׁרַתministerנֶ֫גֶדwhat is conspicuousשֹׁעֵרporterכֵּןsoאֱלֹהִיםgodsסוּרturn asideאוֹצָרtreasureכּוּןbe firmמוּסָדfoundationשָׁלֵםcompleteהָלַךְgoאֵילוֹתElathשָׂפָהlipאֱדוֹםEdomשָׁלַחsendיָדhandאֳנִיָּהa shipיָדַעknowעִםwithאוֹפִירOphirלָקַחtakeאַרְבַּעfourכִּכָּרa roundזָהָבgold